bitcoin القصة الكاملة عن هذه العملة الغامضة ( خاص بصفحة الإقتصاد بالفلاقي)
إعادة للي عندو وسع بال و يحب يفهم العملات المشفرة، بإذن الله ما يندمش حتى اذا المقال طويل
السلام عليكم
شنوا الbitcoin؟ شنيّة تكنولوجيا الblockchain؟ وين تنجّم توصل الحكاية
في ماي 2013، قيمة الbitcoin كانت اقل من 100 أورو، في ديسمبر 2017، وصل سعر الbitcoin حوالي 16 الف أورو، اليوم، سعر الbitcoin حوالي 6938 أورو (المصدر 1)... الى أواخر 2016، قيمة المشاريع الي تخدم على او بالBitcoin، تبلغ حوالي 1,5 مليار أورو (المصدر 2)… من اليوم و الى حدود 2020، المشاريع الي تخدم بتكنولوجيا اسمها الblockchain، منتظر انها تدخّل حوالي 11,9 مليار اورو (المصدر 3)...شنيّة الحكاية؟ فين ماشي العالم؟
نبداو بأوّلا: شنوّا البيتكوين؟
عام 2008، تفجرت الأزمة الماليّة العالميّة، و تلاها افلاس عديد البنوك في أمريكا و حول العالم، و ضياع مدّخرات ملايين النّاس الي كانت تستثمر في الأسواق الماليّة في العالم و الدّول الأوروبية أساسا... في العام هذاكا، خرج مقال دار بين مجموعة ضيقة من مجانين الإعلاميّة، كتبو واحد اسمو Satoshi Nakamoto، يحكي فيه على عملة جديدة رقميّة سمّاها الbitcoin، و في فيري 2009، هبّط اوّل نسخة من اللّوجيسيال "بيتكوين" على موقع منظمة اسمها The Foundation for Peer to Peer Alternatives ...
بطريقة كاريكاتيريّة، شنوّا يعمل اللّوجيسيال هذا، يعمل في عمليّات حساب معقّدة و يكافئ الي الاورديناتارات الي تعطيه قّوة الحساب متاعهم باش يحسب بيها، و المكافأة هوني، موش دولارات او أي دوفيز أخرى، و انّما عملة جديدة، ماهيّاش موجودة في الواقع، و العملة هذي اسمها الbitcoin...
سي Satoshi Nakamoto دخّل معاه ديفلوبارات اخرين، و خدمو مع بعضهم على أساس خلق هالعملة الرّقميّة، و بالشويّة بالشويّة كبرت مجموعة المتعاملين داخل هذه الشبكة، و كثر التّعامل بيناتهم في قضياتهم لبعضهم بعملة الbitcoin... يقول القايل، شنوّا الي يخلّي عباد بعقولاتها تقبل تتعامل بعملة موش موجودة في الواقع؟ في البداية، كان الدّافع حاجة برك: هي انّو المجموعة الي بدات الحكاية، فقدت الثقة في المؤسسات الماليّة بعد كارثة الازمة الماليّة، ماعاش عندهم ثقة لا في البنوك، لا في الفيديرال ريزارف الامريكيّة لا في أسواق الأسهم، و عجبتهم فكرة خلق عملة تكسّر السيستام هذا الكلّ... لكن ولو.... هذا يبقى مجرّد تخضريط حالمين ما عندهم فين يوصلو، شنوّا الي خلّى عدد المتعاملين بالعملة هذي يوصل ل21,5 مليون شخص بنهاية سنة 2017... بكلّ بساطة، التكنولوجيا الي تبنات عليها الفكرة متاع الbitcoin... و التكنولوجيا هذي اسمها الblockchain... كيفاش؟
لمّا تخلقت كمّية متاع bitcoin بين الديفلوبارات الي بداو الفكرة، و لمّا ما دخلو معاهم مجانين إعلاميّة آخرين يتعاملو بينات بعضهم بهالعملة الرّقميّة، كان فمّا قاعدة هي الي تسيّر في المعاملات الكلّ: و هي انّو كلّ تعامل بالbitcoin بين زوز من النّاس، ما يتمّ الّا ما يوافقو عليه اغلبيّة ساحقة من الاورديناتارات الي يسيرو في شبكة الbitcoin، و الاورديناتارات هذي توافق عبر برمجيّات، تثبّت في المتعاملين الإثنين، تثبّت في انّو الي باش يعطي bitcoin عندو بالحق كمية من هالعملة، و تعطي رمز لهاك المعاملة فيه الوقت و التّاريخ و مربوط بآخر معاملة صارت قبلها، و الاورديناتارات الي تثبّت في العمليّة هذي يكونو عند ناس اسمهم les mineurs و هوما ناس يحطّو اورديناترهم على ذمّة الشّبكة باش اللّوجيسيال يستعمل la.puissance de calcul متاعهم في التثبّت و تسجيل المعاملات، و مقابل قوّة الحساب الي يوفروها les mineurs، اللّوجيسيال يكافئهم بخلق كمّية bitcoin و يعطيهالهم... و القوّة هذي، أنّو المنظومة تسمح لأي شخص في العالم عندو الامكانيّات، باش يكونmineur و يربح des bitcoins على خدمة التّثبيت...
طبعا العمل بكلّو يتمّ عن طريق خوارزميّات معقّدة تثبّت في الحسابات و في المعاملات، و تسجّل المعاملات في قاعدة بيانات رقمية موجودة في نفس الوقت عند النّاس الكلّ... نعاود، و هوني بالحق الثّورة، قاعدة معاملات، موجودة عند النّاس الكلّ، و فيها المعاملات الي صارت في العالم اجمع و منذ اوّل معاملة صارت في فيري 2009 (الي عملها Satoshi Nakamoto بيدو وقتها و تلقاووها هوني :https://blockchain.info/…/4a5e1e4baab89f3a32518a88c31bc87f6… ) الى آخر معاملة صارت اليوم 22 ماي 2018...
عاودو افهموني ملييييح، هذي مجموعة من الناس تتعامل بينات بعضها، و هي متأكدة انّو كلّ معاملاتها مسجلة محفوظة في قاعدة بيانات موجودة عند الجميع، و محيّنة في نفس الوقت عند الجميع، و الإطّلاع عليها متاح للجميع، و حتّى واحد منهم ما ينجّم يدخل و يفسّد قاعدة البياتات الي فيها المعاملات... يعني انا و انت تفاهمنا باش نعطيك بيتكوين، تأكّد انّو اذا المعاملة تقبلت، راني بالحق عندي بيتكوين، و تأكّد انّو اذا المعاملة تقبلت فبدون شكّ باش يوصلولك الbitcoin متاعك، و تأكّد انّو مادامني بعتلك الbitcoin الي عندي، مستحيل انّجّم نفكهملك، و تأكّد انّو معاملتنا مسجلة و انّجمو نشوفوها حتلا بعد 10 سنين لقدّام، و تأكّد انّي مستحيل انّجّم نعمل أي تغيير او فسخ لتلك المعاملة... و هذي هي الثّورة الي جابتها تكنولوجيا البلوكشاين : الثقة في المعاملات بين الناس، اذا معاملات تسجلت، انتهى الموضوع، راهي صحيحة، و مستحيل حدّ ينجّم يفسخها او يزيّفها... آي فاش تستنّى؟ هز الbitcoin متاعك و امشي اصرفهم فين تحب...
أخر معلومة، منظومة الخلاص Bitcoinباش تقعد تخلق في عملة الbitcoinعبر مكافأة النّاس الي تحطّ قوّة ذاكرة اورديناترها على ذمّة المنظومة للتّثبيت و الحساب، و باش يتواصل خلق عملاتbitcoin جديدة حتّى نوصلو ل21 مليون bitcoin يدورو حول العالم... متوقّع ان يتوقّف خلق الbitcoinالجدد بعد عشرات السنين من اليوم
طبعا بالوقت، كبر عدد النّاس الي تتعامل في قضياتها بين بعضها بالبيتكوين، و لمّا يكبر العدد، طبيعي باش يتعدّى الbitcoin من الشبكة الافتراضية للحياة الواقعيّة و نهار 16 نوفمبر عام 2012، موقع WordPressيقبل انّو يخلص بالbitcoin، و نهار 29 نوفمبر 2013، Jiangsu Telecomثالث اكبر مشغّل اتّصالات صيني، يقبل انّو يخلص بالbitcoin و من وقتها، و الحبل عالجرّارة، و الbitcoin عمّال يتحوّل فعليّا لعملة تتصرف في المجال الرّقمي طبعا، لكنّ حتّى في الحياة المادّية متاع كلّ يوم...
و بالطبيعة تخلقت بورصات متاع صرف للbitcoin و أصبحت ناس تتبادل فيه مقابل الأورو و الدّولار، بالأسعار الي حكينا عليها لفوق...
الخلاصة من هذا الكلّ، زوز حوايج:
اوّلا، نظريّا و في المطلق، العملة في حدّ ذاتها، ما عندها حتّى قيمة غير قيمة الورقة الي مكتوبة فوقها، او قيمة المعدن الي مكوّنة منّو، الى حدود اليوم، النّاس تاثق في أي عملة و تتعامل بيها، خاطرها تاثق في البنك المركزي و الدّولة الي أصدرتها، تاثق في منظومة التعامل ككلّ، و بالطّريقة هذيكة تصبح ورقة مكتوب عليها 50 دينار تساوي سلعة بقيمة خمسين دينار، الbitcoin دمّر هذه الفكرة من أساسها، هذي عملة ما عندهاش مؤسسة اصدار، هذي عملة قائمة على التعامل المباشر بين النّاس و الثقة هوني ماهيّاش في مؤسّسة، و انّما في سلامة التعاملات بالعملة و استحالة تزييف الاثنين سواء العملة او المعاملات الي صارت بيها، و في انو المعاملات الي صارت موثقة و متاحة للعموم، و في انّو قاعدة البيانات الي فيها المعاملات، موجودة في نفس الوقت و محيّنة في نفس الوقت عند النّاس الكلّ... و هذا جاء بفضل تكنولوجيا البلوكشاين و الي هي موضوع خلاصتنا الثّانية... لكن اهم حاجة هوني هو انو حد ما ينجم يقلكم انو الbitcoin باش يطلع او يهبط في الفترة الجاية، مازال اصلا حتى المفهوم جديد على علماء المالية و الاقتصاد، مازال الشي مفرّت، متروك للعموم، العرض و الطلب دون دخل اي شيء اخر، الثقة الي تطلع و تهبط، لذا، ما عندي حتى نصيحة حول الاستثمار فيه او لا...
البلوكشاين هي تكنولوجيا ثوريّة، بدات عام 2008، و توّا سنوات بفضل نجاح الbitcoin، اثبتت انّها تكنولوجيا اختراقها هو عمليّة قريبة جدّا من الإستحالة، و في المقال الجاي بإذن اللّه، باش نحاولو نحكيو على الآفاق الي تفتحها لبتكنولوجيا هذي لتونس و للعالم في المحالات الاقتصاديّة و الماليّة....
أخيرا: زوز معلومات:
Satoshi Nakamoto الي خلق الbitcoin لليوم ما يعرفو حد، خرجت إشاعة انّو ياباني، و ثبت انّو موش صحيح، حد ما يعرف يا ترى شخص واحد، منين، شنوّا اصلو، يا ترى مجموعة اشخاص، شكونهم؟ حد ما يعرف لليوم
الbitcoin في نظر القانون التّونسي موش عملة، موش موجود أصلا...يعني نظريّا انّجمو نشريو bitcoin مقابل دينارات... لكن، لااااكن، يمكن بسهولة يتصنّف كأصول (يعني سلعة او دار او كرهبة) و يبقى معتبر قانونيا كشراء أملاك بالخارج، و هذي لازمها ديكلاراسيون للبنك المركزي...
على خير
شكرا لمؤسسة TALAN TUNISIE الي لزّتني بالسيف باش نهتم بالموضوع😁
و شكرا لاصدقائي الأعزاء كريم و معز على رحابة صدرهم مع اسئلتي😁
المصدر 2 : مقال لمحامي فرنسي في مكتب Gibson, Dunn & Crutcher LLP تلقاووه هوني
Gibson, Dunn & Crutcher LLP
المصدر 3: دراسة لمكتب market and research تلقاووها هونيhttps://www.researchandmarkets.com/research/lmc82t/global_blockchain?w=12
